«ЭКСКЛЮЗИВ» коллекционердар түмсүүлэрэ 10 сыллаах үбүлүөйүнэй түмүктүүр тэрээһинэ
Хадаар нэһилиэгэр «Эксклюзив» коллекционердар түмсүүлэрэ муус устар 24 күнүгэр 2014 сыллаахха тэриллибитэ. Нэһилиэк коллекционердара нэһилиэк олоҕун дириҥ ис хоһооннууллар, киэргэтэллэр. Түмсүүгэ кэрэни кэрэхсии көрөр 19 кэрэ аҥардар, Далбар хотуттар умсугуйан түмсэллэр. Коллекциябыт темата киэҥ, инникитин өссө сайыннара, кэҥэтэ турар былаан баар. Бу иннинэ нэһилиэк олохтоохторугар үбүлүөйүнэй күрэхтэри ыыппыт эбит буоллахпытына, ыам ыйын 18 күнүгэр түмсүү Ньургуһун күнүн көрсө, айылҕаҕа муһунна. Чурапчы улууһа ускуустуба бары көрүҥэр талба талааннаах дьону өйүүр. Нэһилиэк, улуус култуурунай, духуобунай сайдыытыгар сүҥкэн кылааты киллэрэ сылдьар дьоммутун үбүлүөйдээх күннэринэн улуустааҕы култуура управлениета, директор Петр Гуляев, нэһилиэк баһылыга Афанасий Степанов ааттарыттан эҕэрдэ тылы «Тускул» культурнай-спортивнай киин дириэктэрэ Николай Дьячковскай этэн туран бастыҥ үлэлээхтэри махтал суругунан, бочуотунай грамотанан, бэлиэлэринэн наҕараадалаата.
Ол курдук аҕам саастаах коллекционердарбытыгар Наталья Григорьеваҕа, Елена Дьячковскаяҕа, Мотрена Титоваҕа, Зоя Матвееваҕа нэһилиэк баһылыга Афанасий Степанов махтал суруга уонна нэһилиэк бэлиэтин көрдөрөр статуэткалара туттарылыннылар. Улуустааҕы култуура управлениетын махтал суруктара Зинаида Теренковаҕа, Александра Никитинаҕа, Анна Лукинаҕа, Вера Старковаҕа, Зинаида Лукинаҕа, Клавдия Яковлеваҕа, Надежда Гаврильеваҕа, Яна Климоваҕа, Наталия Лукинаҕа, Татьяна Осиповаҕа, Надежда Собакинаҕа, София Ивановаҕа туттарылыннылар. Культура бочуотунай грамотатынан Татьяна Дьячковская, Лариса Лукина, өр сыллаах ситиһиилээх үлэтин иһин үрүҥ көмүс култуура бэлиэтинэн уонна бочуотунай грамотанан Ирина Филиппова, «Чурапчы улууһун култууратын сайдыытыгар кылаатын иһин» бэлиэнэн түмсүү салайааччыта Лена Ноговицына наҕараадаланнылар.
Минньигэс астаах сандалы тула олорон ирэ-хоро кэпсэтэн, коллекциябытыгар эбии бэлэхтэһэн, оонньууну оройуттан тутан, илии тутуурдаах бу күнү атаардыбыт. Махтанабыт бу үбүлүөйү тэрийсибит «Тускул» культурнай-спортивнай киин бары үлэһиттэригэр, «Түмсүү-төлкө төрдө» буоларын умнумуоҕуҥ, түмсүүлээх буолуоҕуҥ!
