Горн, барабаан доҕуһуоллаах, кыһыл хаалтыс кэрэһиттээх пионердар Чурапчыга Саха сиригэр пионерскай тэрилтэ төрүттэммитэ 100 сылыгар аналлаах тэрээһиҥҥэ муһуннулар. Хадаар нэһилиэгин «ЭКСКЛЮЗИВ» коллекционердар түмсүүлэрэ бу тэрээһиҥҥэ кыттан, опыт атастаһан кэллилэр.

Тэрээһиҥҥэ коллекционердар муспут араас маллара-саллара, дьикти дьарыктара дьон-сэргэ биһирэбилин ылла.

🔥 «Пионерия мин олохпор -музей в чемодане» конкурска Ирина Филиппова кыттан 3-с бочуоттаах миэстэни ылла.
🥁 «Былыргы пионерскай мал» конкурска Лариса Лукина кыттан пионерскай вымпелынан наҕараадаланнна
🎒 «Оскуола өйдөбүнньүк маллара» конкурска Татьяна Дьячковская кыттан юбилейнай вымпелынан наҕараадаланна

 

Кэрэни — саҥаны таба көрөр, ааспыт олоҕу санатар араас тээбириннэри, киэргэллэри мунньар дьон ахсаана сыллата элбээн иһэр. Кыттааччылар кэлэннэр саҥа үүммүт сылга көрсөн атыы-тутуу, атастаһыы, биир интэриэстээх дьону кытта билсэн, сэһэргэһэн үлэ бөҕөргүүр акылаатын түһэрдилэр.